المحطة الإحبارية جريدة إليكتورنية شاملة
كتبت خيريه غريب
العلاقات الحقيقية مش بس كلام بيتقال، ولا رسائل بتتكتب، ولا وعود بتتركن على الرفوف.
العلاقات الحلوة أفعال.. قبل الكلام، وقبل الأعذار، وقبل حتى “أنا آسف
كلمة زي “ما بزعلش منك” جميلة، لكن الأجمل منها:
“مايهونش عليا زعلك”.. فيها خوف، وحرص، وحب مافيهوش أنانية.
العلاقات اللي تعيش، هي اللي الناس فيها بتاخد وتدي، مش حب من طرف واحد، ولا طيبة بتترد بالإهمال. هي العلاقات اللي بيخافوا فيها على بعض، اللي الزعل ما يهونش، والغياب ما يتسكتش عليه.
الصراحة مش قسوة، والوُضوح مش ضعف. دي راحة.
العلاقات اللي ترتاح فيها، وتضحك فيها بصدق، وتحكي من غير ما تفكر ألف مرة قبل الكلمة..
دي اللي تستاهل تعيش علشانها.
الناس الحلوة مش بس اللي تقول “أنا جنبك
هم اللي فعلاً تلاقيهم وقت ما الكل اختفى
اللي وجودهم دفء، وحبهم سند، وطيبتهم مش ضعف.. دي نعمة.
دوروا على الناس دي، وأمسكوا فيهم..
بلاش يهونوا عليكم، بلاش تخلوا الطيبين يندموا على طيبتهم وحبهم ليكم
العلاقات اللي تدوم، مش هي اللي بتبدأ بس بشرارة،
هي اللي بتكمل بـ نية صافية، وأفعال تبني مش تهد، وقلوب مابتعرفش الغدر.
دي العلاقات اللي ليها عمر طويل ..
