المحطة الإخبارية جريدة إليكترونية شاملة
كتبت د/ مى غريب
طب تعالى نتكلم كده من الآخر
كل يوم تبص في المراية، تقول لنفسك:
“أنا كويس، صحتي تمام… ماشي الحال!”
بس ولا عمرك سألت:
“رجلي دي… ليها علاقة بقلبي؟”
أقولك: ليها!
وعلاقة قوية كمان… يمكن أقوى من كبسولة الضغط اللي بتاخدها وانت مش فاهم بتعمل إيه!
تعالى أفكرك بحقيقة جسمك:
الدم بينزل لتحت بسهولة…
لكن يطلع لفوق؟ لأ، مش بنفس السهولة.
واللي بيشيل الحِمل ده مش قلبك لوحده…
فيه بطل ساكت، شغّال ليل نهار، وإنت ما خدتش بالك منه:
عضلات رجلك.
كل مرة بتمشي، عضلات الرجل بتعصر الدم كأنها “مضخة أرضية”، وتوصّله لقلبك اللي فوق.
يعني باختصار؟
رجلك = قلبك التاني
ولو سبتها من غير حركة؟
كأنك فصلت السلك اللي بيوصل الكهرباء للماتور.
هتحس بثقل
دوالي
خدر
تعب ملوش تفسير
وكل ده يتركن في كاحلك وانت مش فاهم إن السبب… كسل بسيط.
متخيل إن العلاج في علبة دوا؟
ولا في وصفة من النت؟
المفاجأة:
العلاج في أول ٣٠ خطوة بتاخدهم برجلك كل يوم.
ومش بطلب منك تجري ماراثون…
أنا بطلب منك:
تطلع السلم بدل الأسانسير
تمشي نص ساعة (حتى لو جوه البيت)
تمرّن رجلك مرتين في الأسبوع ولو بكرسي صغير
وبلاش تقول: “أنا صغير، دي حاجات بتاعة الكبار!”
لأن ٣ من كل ٥ شباب عندهم مشاكل في الدورة الدموية وهما فاكرينها “إرهاق شغل”.
عايز تحافظ على قلبك؟
ابدأ من تحت لفوق
ابدأ من رجلك.
خلي “قلبك التاني” يشتغل… وانت بس امشي.
