المحطة الإخبارية جريدة إليكترونية شاملة
بقلم د/مى غريب
في زمن السرعة والمعلومة الطايرة من جروب لجروب، بقت الشائعات الطبية زي النار في الهشيم! وعلشان كده حبّينا نبدأ معاكم سلسلة توعوية جديدة بعنوان “افهم الصح”، هدفها ببساطة:
نسمع الشائعة، نفهمها، نصححها… ونحافظ على صحتنا بوعي!
في السطور الجاية، هنستعرض معاكم بعض أشهر الشائعات الطبية، ونفكها واحدة واحدة بلغة بسيطة ومعلومة دقيقة:
١. هل السكر بييجي من الحلويات؟
المعلومة المنتشرة:
“اللي بياكل حلويات كتير بيجيله سكر!”
الحقيقة:
مرض السكري مش مرتبط مباشرة بالحلويات فقط، لكنه نتيجة عوامل متشابكة زي:
الاستعداد الوراثي.
مقاومة الإنسولين.
قلة الحركة.
التغذية غير المتوازنة. يعني قطعة جاتوه مش هي السبب، لكن أسلوب حياة كامل هو اللي يصنع الخطر!
٢. الأشعة بتسبب سرطان؟
المعلومة المنتشرة:
“بلاش أشعة.. هتفتح على نفسك باب ما يتقفلش!”
الحقيقة:
الأشعة أنواع:
الأشعة السينية (X-ray) آمنة بجرعات معينة.
التصوير بالرنين المغناطيسي لا يستخدم إشعاع أصلاً.
الأشعة المقطعية تحتاج إشراف طبي لتقنين التكرار. يعني الأشعة مش عدو… هي أداة إنقاذ لو استخدمناها صح.
٣. الحجامة تغني عن العلاج؟
المعلومة المنتشرة:
“اعمل حجامة وخلاص… جسمك هيتظبط!”
الحقيقة:
الحجامة أداة مساعدة ضمن الطب التكميلي، لكن:
لا تغني عن التشخيص الطبي السليم.
لا تُستخدم لعلاج كل الأمراض.
يجب أن تكون تحت إشراف مختصين. يعني الحجامة مش سحر، هي وسيلة مكملة… مش بديلة.
٤. الصداع معناه إن الضغط عالي؟
المعلومة المنتشرة:
“حاسس بصداع؟ أكيد ضغطك عالي!”
الحقيقة:
الصداع له عشرات الأسباب منها:
الجفاف.
التوتر والقلق.
الإرهاق وقلة النوم.
مشاكل الجيوب الأنفية. يعني مش كل صداع = ضغط، ولازم قياس حقيقي وتحليل السبب.
٥. تحليل الدم بيكشف كل حاجة؟
المعلومة المنتشرة:
“اعمل تحليل دم شامل… يبان كل شيء!”
الحقيقة:
تحليل الدم مهم جدًا، لكن:
في أمراض مش بتظهر فيه.
لازم تحاليل متخصصة حسب الحالة.
أحيانًا نحتاج أشعة أو فحوصات إضافية. يعني التحليل خطوة… مش النهاية.
٦. الطفل التخين صحي؟
المعلومة المنتشرة:
“بسم الله ما شاء الله.. شايل اللحم زي العسل!”
الحقيقة:
السمنة في الأطفال:
مش علامة صحة.
بتأثر على القلب والتنفس والمفاصل.
ممكن تكون مؤشر لسوء تغذية! يعني طفل تخين ≠ طفل سليم.
٧. عندك برد؟ خد مضاد حيوي!
المعلومة المنتشرة:
“اديله مضاد قبل ما يسخن أكتر!”
الحقيقة:
نزلات البرد غالبًا فيروسية، والمضاد الحيوي:
مش بينفع فيها.
ممكن يعمل مقاومة بكتيرية.
يسبب مشاكل في المناعة والجهاز الهضمي. يعني المضاد مش حلاّل لكل دور برد!
الزتونة
الشائعة الطبية ممكن تبدو بسيطة… لكن ضررها كبير!
علشان كده خليك دايمًا واعي، اسأل، واقرأ، و”افهم الصح”.
وهنستناك في باقي حلقاتنا الجاية في السلسلة، عشان نكمّل المشوار سوا… بخطوة وعي تحميك وتحمي غيرك.
