المحطة الإخبارية جريدة إليكترونية شاملة
بقلم ا/ مي غريب
كتير من الناس بيفتكروا إن “الطب” هو بس أدوية وجراحة وتحاليل، لكن الحقيقة إن في جوانب تانية مهمة جدًا، بنسميها الطب التكميلي، ودي مش بديل عن الطب التقليدي، لكنها ذراع مساعد بيساعد الجسم والعقل على التعافي بشكل طبيعي، وبطريقة آمنة لو اتعملت صح.
خلينا نحكي ببساطة عن أهم المجالات اللي لازم نعرفها ونتعامل معاها بوعي:
1. الحجامة:
هي سنة نبوية قبل ما تكون علاج، وبتشتغل على تنشيط الدورة الدموية وطرد السموم من الجسم. الحجامة بتنفع في حالات زي الصداع المزمن، آلام المفاصل، والتعب العام. بس لازم نعملها عند مختص مؤهل، مش أي حد بيمسك كاسات ويقول أنا معالج.
2. التدليك العلاجي والاسترخائي:
التوتر بيحب يستخبى في عضلاتنا! التدليك العلاجي بيساعد في فك التشنجات، وتحسين تدفق الدم، وحتى تحسين الحالة النفسية. أما الاسترخائي فده لحظات راحة بجد، تساعدنا نهدى ونرجع نكمل شغلنا وحياتنا بنشاط.
3. التأهيل الحركي:
بعد الإصابات أو الجلطات أو العمليات، الجسم بيحتاج يرجع يتعلم يتحرك من جديد. هنا بييجي دور التأهيل الحركي، واللي بيرجع للعضلات والمفاصل توازنها وقوتها. ومهم جدًا نلتزم بالخطة اللي يكتبها لنا أخصائي التأهيل، عشان نوصل للنتيجة المطلوبة بدون ضرر.
4. الكايروبراكتيك:
ناس كتير بتشتكي من ألم الظهر والرقبة بدون سبب واضح. الكايروبراكتيك بيعتمد على تعديل فقرات العمود الفقري وتحسين وضعها، وده بيخفف الضغط على الأعصاب ويريّح الجسم كله. بس أوعوا تجربوه مع غير مختص مؤهل، لأن التعامل مع الفقرات موضوع حساس.
5. الموبيليزاشن:
ده نوع من العلاج اليدوي بنستخدمه لتحسين حركة المفاصل، وبيفيد الناس اللي عندهم تيبّس أو محدودية في الحركة. بنشتغل فيه بلُطف وبعلم، مش بعنف، عشان نحافظ على سلامة المفصل ونرجّع مرونته تدريجيًا.
نصيحة من القلب
كل الطرق دي مفيدة، لكن استخدامها لازم يكون بعلم وبحذر. مش كل ألم نروح نعمل له حجامة، ومش كل شد عضلي نحلّه بتدليك! لازم نعرف السبب، ونفهم جسمنا، وناخد نصيحة المختص قبل أي خطوة.
وأخيرًا
الرفق مش بس أسلوب حياة، ده كمان مبدأ في العلاج. جسدك أمانة، فلا تسلمه ليد غير مؤهلة، ولا تجرب على نفسك من غير وعي. خليك حريص، اسأل، وافهم، واستشير أهل العلم.
